Pagpahigayon sa VSU-CAT karong tuiga, nagmalampuson

Gipasabot sa Admissions Office sa Visayas State University (VSU) nga malampuson nga gipahigayon nila ang College Admission Test kun VSU-CAT alang sa mga incoming first year students sa tunghaan.

Atol sa DYDC Special Talk ning sibyaanan niadtong Hunyo baynte dos, gibutyag ni VSU Admissions Office Head Dr. Lilian B. Nuñez nga wala kaayo silay nasugatan nga kakuli-an karong tuiga sa pagpahigayon sa VSU-CAT.

Kini tungod kay sukwahi sa nanglabay nga admission tests, anaa na silay online ticketing system diin kinahanglan nga magparehistro online ang mga mangindahay sa dili pa sila mu-anhi sa VSU alang sa eksaminasyon.

Ang maong lakang nakatabang aron mamenosan ang pagpunsisok sa mga exam takers sa usa ka schedule ug dali ra silang maserbisyohan ug mapahimutang. Karong tuiga usab, matag adlaw’ng Sabado sa buwan sa Enero hangtod sa unang bahin sa Marso ang pagpahigayon sa eksaminasyon.

Apan gibutyag ni Dr. Nuñez nga aduna silay mga testing centers sa Kabisay-an nga wala na gi-apil tungod sa “cost-cutting” ug tungod kay menos ra ang mu-take sa exam sa maong mga testing centers.

Dugang ni Nuñez nga paspas usab ang pag-check sa mga test papers karong tuiga kun ikumparar sa nanglabay’ng tuig tungod kay automated na kini hinungdan nga dali’ng napagawas ang resulta sa VSU-CAT.

Angayang masayran nga mukabat sa 11,000 ang mga VSU-CAT takers sa tibuok VSU System diin 7,000 niini ang buot mutungha sa VSU-Main. Sa 7,000 nga mingtake, 2,600 lang ang palaran nga makasulod isip freshman sa VSU-Main Campus.

Gitataw usab ni Nuñez nga wala nay higayon nga makahangyo pa nga mag-enroll sa VSU ang mga wala nakapasar sa eksaminasyon tungod kay anaa na sa limit ang slots nga gihatag. Ka -usa sa matag tuig ra usab ipahigayon ang VSU-CAT.

Gipasabot sa opisyal nga aduna nay tentative nga schedule ang online enrolment ug ang proseso sa enrolment sa mga incoming freshmen sa buwan sa Hulyo apan nag-agad pa kini sa mga kabag-ohan sa VSU Officials.

Mapasalamaton usab si Dr. Nuñez sa higayon tungod kay igo ra nga nahuman ang pagpahigayon sa VSU-CAT sa wala pa gipa-ubos sa Community Quarantine ang mga nagkadaiyang lugar sa nasud nunot sa COVID-19 Pandemic.

Leave a Reply

Your email address will not be published. Required fields are marked *