Mga estudyante sa VSU, nagpadayag sa ilang yango-ngo sa enrolment karong semester

Malampuson man nga nalunsad sa Visayas State University (VSU) ang online enrolment karong second semester school year 2019-2020, aduna gihapoy pipila ka mga yangongo nga gipadayag ang mga magtutungha ug mga nagpasiugda sa enrollment.

Si Registrar Computer Programmer Christan Mikhael Restor nagkanayon nga ubay-ubay ang mga magtutungha nga nagpa-enroll ug nituman sa ilang registration schedule apan sa ilang bahin, kuwang sila og manpower sa validation ug encoders.

Matod pa, pito lang ang ni-aplay isip mga student assistants kanila karong enrolment, ubos kaayo sa kapin traynta nga mga encoders nila sa miaging enrolment.

Naproblema usab sila sa kahapsay o batasan sa ubang mga magtutungha. Ang uban kanila, musuksok sa linya aron maka-una samtang ang uban, dili mao ang personal nga naghikay sa ilang admission ug gipadala lang sa ilang mga kaubang estudyante.

Gibutyag ni Restor nga wala say igong mga personnel ug security nga nagpasilitar sa linya sa mga estudyante. Aminado siyang basig nagkuwang sila og komunikasyon sa maong bahin

Dugang pa niya, naglisod usab ang ubang mga estudyante sa pag-proseso sa online enrolment sama sa pag-click sa subject nga ilang kinahanglang kuhaon tungod sa pre-requisite subjects nga wala pay final grade nga gipasa ang ubang mga magtutudlo.

Tungod niini, kinahanglan pa nilang mag-antos sa paglinya ug magpa-encode.

Nunot niini, gihangyo niya ang ubang mga instructors sa tunghaan nga magpasa na og mga grado karong semanaha aron dili malangan ang mga estudyante sa pagpa-enrol online.

Mensahe niya sa mga estudyante, lugwayan ang pasensya kay dili nila ma-abi-abi ang tanan sa samang higayon apan andam sila nga moserbisyo bisag lapas na sa cut-off time.

Bisan pa man sa kasamok ug kahuot sa linya, gibutyag ni Restor nga tungod sa online enrolment, mas nipaspas ug daghan na ang opisyal nga na-enrol sa tunghaan.

Sa pagkakaron aduna nay tres mil kwaro syentos otsenta nga mga magtutungha nga opisyal nga na-enrol.

Sa laing bahin, gibutyag ni Kyle, usa ka Mechanical Engineering student sa VSU nga gawas sa manpower, kuwang ang pasilidad sa enrolment karon.

Matod pa niya, dili igo sa kadaghan sa mga nagpa-enrol ang convention center, venue sa enrolment, maong naghuot ug gibati ang sobra nga kainit ug kaalimoot didto.

Usa siya sa mga gipalad nga hapsay nga naka-access sa online enrolment apan gibutyag niya nga medyo langan gihapon kay kinahanglan pang i-validate ang Certificate of Registration o COR.

Pero sa kinatibuk-an, matod sa magtutungha, mapasalamaton siya ug nalipay nga gilunsad ang online enrolment.

Si Restor usab nagkanayon nga padayon nilang paningkamutan isip mga tigpasiugda nga mas mapauswag pa ang proseso sa enrolment alang sa kaharuhay sa mga magtutungha ug sa ilang bahin.

Perlyn Fernandez, Kalambuan News.

Leave a Reply

Your email address will not be published. Required fields are marked *