Dugang mga palisiya, gipatuman sa GSIS alang sa mga miyembro

Maayong balita alang sa mga miyembro sa Government Service Insurance System kun GSIS. Adunay mga bag-ong updates ang GSIS nga gipatuman karon lang semanaha alang sa mga miyembro niini.

Atol sa “Special Talk” radio program sa DYDC-FM kagahapon, Nobyembre dose, gibutyag ni GSIS Maasin Branch Manager Cecila Tenaja nga adunay dugang nga programa ang ilang buhatan isip pagtubag sa panginahanglan sa mga miyembro.

Kini mao ang Alternative Mode of Application for Pension Commencement, bag-ong palisiya sa Multipurpose Loan, ug ang GFAL/Top-Up.

Sa Alternative Mode of Application, mamahimo nang mag-apply sa pagsugod sa pension ang mga miyembro pinaagi sa pagpadala sa mga requirements online.

Mapasalamaton usab si Tenaja sa higayon nga makapadayag sa mga serbisyo sa GSIS, hilabi na sa Maasin Branch ug matubag ang mga pangutana sa mga miyembro niini. Sa dugang mga pangutana ug transaksyon, mamahimong mo-email sa gsismaasin@gsis.gov.ph.

Angayang masayran nga nagpatuman usab og loan moratorium ang GSIS atol sa pagsugod sa COVID-19 niadtong Marso diin wala usa gi-kuhaan og deduction ang mga miyembro niini. Dugang pa, nagpatuman ug laing 60-day moratorium ang GSIS alang sa buwan sa Nobyembre ug Disyembre. (Buen Josef C. Andrade)