CBI VSU- Chapter nagpahigayon og Blood Pressure Monitoring!

Nagtanyag og Blood Pressure (BP) Monitoring ang Christian Brotherhood International (CBI) Visayas State University (VSU) Chapter sa pipila ka mga lugar ning dakbayan sa Baybay, dili pa lamang dugay.

Ang CBI usa sa mga student organizations ning tunghaan nga natukod niadtong tuig mil nwebe syentos otsentay dos nga adunay katuyuan sa pagpauswag sa relasyon sa mga estudyante nga myembro sa relihiyon nga Iglesia ni Cristo (INC) ug giyahan sila sa maayo’ng pagdumala sa ilang mga kinabuhi ug pagtoon.

Gipahigayon ang kalihokan sa pagpanguna ni CBI-VSU Chapter President Jawrence Benz Casupang ug mga opisyales niini uban sa pakigtambayayong sa usa ka nurse gikan sa Nurse Deployed Program (NDP) sa Department of Health (DOH) Region 8.

Ang Blood Pressure (BP) Monitoring ubos sa ilang kalihukan nga CBI Cares nga gilunsad ni INC Executive Minister Eduardo V. Manalo sa tanang CBI-Chapters sa mga tungahaan sa tibook nasud aron makatabang sa pag-amping sa kahimsog sa mga miyembro sa INC lakip na ang dili mga miyembro niini.

Gipahigayon ang maong aktibidad didto sa mga kapilya sa INC nga nahimutang sa Barangay Guadalupe, Barangay Kilim ug Manuel L. Quezon St. ning dakbayan diin gatusan ka mga partisipante ang mitambong.

Matod pa ni NDP-DOH Region 8 Nurse Prince Japred Toring, base sa resulta sa BP Monitoring, ubay-ubay sa mga partisipante ang adunay taas nga BP o mga hypertensive.

Ang uban kanila aduna nay mga maintenance medication maong gitambagan niya nga mahimong compliant sa ilang mga tambal aron mahimong normal ang ilang BP.

Samtang, ang uban nga sa unang higayon pa lamang nagpa-BP, nasutang medyo taas usab ang ilang BP maong gitambagan usab sila ni Nurse Toring nga mokunsolta sa doktor.

Nunot niini, gibutyag ni Nurse Toring ang mga posibleng hinungdan sa pagtaas sa BP ug angayang buhaton mahitungod niini.

Dugang pa sa nurse, mahimo usab niyang i-refer sa City Health Office ang resulta sa maong kalihukan aron ma-follow up ang mga partisipante nga taas ang BP.

Samtang, gisaysay ni CBI Spiritual Adviser ug Visca Resident Minister John Henry Panaglima nga padayon sila nga maghatag og susamang serbisyo alang sa tanan.

Sa laing bahin gibutyag ni CBI-VSU Chapter President Casupang ang mga nakalinya nilang mga kalihukan bag-o pa mahuman ang tuig. Lakip na niini ang Lingap Pamamahayag (Evangelical Mission), CBI team Building ug CBi Homecoming.

Perlyn Fernandez, Kalambuan News.

Leave a Reply

Your email address will not be published. Required fields are marked *